Campionatos do Mundo de Triatlón

Dúas webs, dous públicos

Un mundial de triatlón ten a súa propia web internacional, en inglés e pensada para os atletas: inscricións, regulamento, tempos. Esa non é a nosa.

A nosa é a da cidade. A que responde as preguntas que fai un veciño de Pontevedra cando lle cortan a rúa un mércores: por onde pasan, a que hora, onde podo aparcar, que hai que ver, como me apunto de voluntario. Información de interese para quen vive aquí, non para quen vén competir.

Parece unha distinción menor e non o é. Cambia o idioma, cambia o ton e cambia o que se pon primeiro.

O que fixemos en cada edición

2019, ITU Multisport. A primeira web multiidioma, a publicación dixital da revista do evento, campañas de anuncios, presentacións, e asistencia técnica na entrega de premios.

2023, Gran Final das Series Mundiais. Unha segunda web, tamén multiidioma, co sistema de altas de voluntariado, os fondos e banners, as presentacións e a dirección técnica.

2025 e 2026. Desenvolvemento, mantemento e asesoría da web local. Menos volume e máis continuidade: o evento xa ten a súa estrutura e o que fai falla é que alguén a manteña viva entre edición e edición.

O día que non se pode repetir

Un evento deportivo internacional ten unha característica que non teñen os demais encargos: a data non se move. Se algo falla ás cinco da tarde do venres, non hai unha versión corrixida o luns.

Na entrega de premios de 2019 estivemos alí, cos discursos das autoridades. O procedemento era que os enviasen antes para revisalos e traducilos, de xeito que aparecesen nas pantallas en varios idiomas mentres se pronunciaban, e que os deportistas de setenta países entendesen o que se estaba dicindo. Dous discursos non chegaban. Apareceron aproximadamente unha hora antes de que empezase o acto.

E logo estaba o outro problema, o que non se podía resolver por moito que se preparase: a entrega de premios empezaba pouco despois de rematar algunhas categorías. Así que a cerimonia xa estaba en marcha mentres aínda nos seguían chegando resultados e clasificacións para poñer nas pantallas, en directo, mentres a xente miraba.

Non hai ningunha captura de pantalla que ensine ese traballo. Pero é a razón pola que nos volveron chamar nas tres edicións seguintes.