Panel de Toponimia

O punto de partida

O concello mantiña o seu inventario toponímico nunha aplicación antiga que xa non se podía soster. Recollía o traballo de anos de campo do Servizo de Normalización Lingüística: nomes de lugar, a súa localización exacta e a documentación asociada.

O encargo era substituíla por unha aplicación nova, cun buscador público útil e un editor de fichas para o persoal técnico.

A decisión que propuxemos

Presupostamos traballar directamente sobre a base de datos orixinal, sen migrala. Non era comodidade: era a forma de eliminar o risco máis grande do proxecto, porque unha migración de datos xeográficos é onde todo adoita romperse.

A migración fíxose igual, por outra vía, e chegou con perdas. A partir de aí, boa parte do encargo consistiu en volver poñer no seu sitio o que xa existía.

Recuperar o que se perdera

Máis de dúas mil fichas quedaran sen a súa xeometría, sobre todo nas parroquias de Xeve e Ponte Sampaio. O sistema antigo gardaba cada ficha tamén como ficheiro de cartografía individual, e alí seguía a información.

Escribimos un proceso que reconstrúe as fichas afectadas a partir deses 17.049 ficheiros, comparando cada un coa base de datos nova. As que se podían recuperar de forma determinista recuperáronse. As demais quedaron documentadas unha a unha para que o servizo decida.

O que hai hoxe en produción

Un buscador público que filtra por parroquia e por 88 xenéricos distintos, que é o vocabulario propio da toponimia local: os agros, as brañas, os chamadeiros. O mapa amosa á vez puntos, liñas e polígonos, que era o difícil.

E un editor de fichas con permisos, para que o servizo manteña o inventario sen depender de nós. Esa é a parte que máis nos importa.

O código vive fóra do directorio público do servidor. Só é accesible desde a web o estritamente necesario.