InvitoPro

O problema que ninguén considera un problema

Cando un concello organiza unha inauguración, un pleno extraordinario ou unha entrega de premios, alguén ten que decidir a quen se invita, en que orde se senta a xente, quen confirmou, quen non contestou e quen aparece sen avisar.

Iso faise case sempre nunha folla de cálculo que vai por correo, que ten tres versións distintas e que ninguén sabe cal é a boa. Funciona ata que deixa de funcionar, normalmente o día anterior ao acto.

Por que o fixemos nós

Levabamos anos vendo o mesmo problema en clientes distintos. Non había ningunha ferramenta pensada para protocolo institucional en galego, así que a construímos.

A primeira instalación foi para o Concello de Pontevedra, que xa fixo envíos reais con ela. Non é unha demostración: é software en produción.

Decisións que non se ven pero se notan

Unha instancia por cliente. Os datos dun concello non conviven cos doutro na mesma base de datos. É máis traballo de mantemento para nós e menos superficie de risco para eles.

Protección de datos por deseño. Unha lista de invitados a un acto institucional é un ficheiro de datos persoais, con nomes, cargos e correos. Os enderezos IP pseudonimízanse aos trinta días, hai rexistro de auditoría do que fai cada usuario, e o segundo factor de autenticación non é opcional.

Galego de serie. Non como tradución engadida ao final, senón como idioma no que se pensou a ferramenta.

Onde está agora

Hai unha demostración pública que se pode probar sen instalar nada, e unha ficha técnica preparada para os expedientes de contratación, porque un concello que queira contratalo vai necesitar xustificalo por escrito.

Segue en desenvolvemento activo. Cada cousa que pide o cliente que xa o usa acaba mellorando a ferramenta para os seguintes.